Pages

Friday, July 8, 2011

Mari berlatih kecek.



Yo adik kakok auntie uncle sekalie, guano crito lo ni? Sihat blako-lako kow oghe drumoh tuh…? Bisneh jjale molek dop? Homwek hok teacher buwi baru nih siap blako doh kow? Kalu berehh blako, jange lupo oyak Alhamdulillah segalo puji bagi Tuhe. Hoo laa ni abe fifi nok peringat etek… sumuo nikmak hok kito buleh loni nih… tok kiro la nikmak kewange kow.. nikmak isle ime kow.. nikmak buleh gi jjambae kow.. blako-lako nyo keno ssabit ko Allah. Dio lah Tuhe hok maha pmuroh lagi maha pengampon…

          Ya, kali ni kito bertemu lagi dale segmen prektih kecek klate…. Kawe pom buke panda lah mano nok kecek klate brapi-rapi nih… saeng ambo si Fikri Osman nge si Nasif Zaim nge si Syuhadah biso lagi pade ambo… tapi sebab ambo sero bosae duduk drumoh lamo2 plus smesta kolej pom dop start lagi… tok saloh lah kironyo ambo bermadoh bicaro buleh seperenggae duo… wahh!!!

          Nok dijadi kae crito, cuti baru nih ambo berkesempatae jugop laa untok kelik klate menjenguk oghe tuo di kapong. Ajat asal nok kelik nge bah. Mugo bah Transnasional nge Mutiara banyok seat kosong etep… tapi kito cumo buleh merancae, Allah juo hok menentukae. Maka tok pasa-pasa aku keno la drive keto from Subang Jaya to Pasir Mas. Abah dok teme sebloh, pokcik nge mokcik ambo pulok dok alik blakae… jadi kiro 4 oghe lahh blako nyoh dok dale keto ambo…

          Senghoti weh ambo ghoyak… bowok keto male-male ni meme menuntut kecergasae fizikal n mental. Doh la banyok bah loghi dok bubiyah-bubiyah tengoh jale, huje renya-renya lagi lah menamboh raso nok telelak…pergh meme bahayo nngoti boh. Kalu takdok mnatae Redbull mahupom Livita, kirem sale awal-awal la… ambo tok kae bowok keto punyo lahh. Pi gak mujo gop aa abah, pokcik nge mokcik banyok bbua… at least takdop aa ambo sero ngatuk lah mano… hehe.

          Memandaekae ambo oghe paling mudo dale keto, ambo tok banyok nnyapuk aa gapo hok oghe tuo dok bbua. Hok menariknyoh, kebanyokkae isi perbuale berkisar pasal Klate kito. Doh negri sdiri meme la keno amik ccakno dop… ke guane? Banyok gop laa knowledge hok ambo buleh bilo join skaki kalu denga oghe tuo bbua. Hoho… jadi, sepeti biaso, mari kito telusuri sedikit sbanyok perbuale rikah dale pjalanae ke negri Cik Siti Wan Kembang… ^^

-----------------------------------

“Wey laa hoo… deghah-deghah deh bah lo ni… geghun sero.”

“Hmm.. dreba bah lo ni tok kaba ingat…kalu nok slamak naik ketapi je la…”

“Naik ketapi meme slamak.. tapi, tu lahh, payoh nok tido… geger etek bunyi rel dio.. pahtu lamo pulok nyoh nok buleh ko nnyapa sstesen…”

“Hok tu so kkaro. Lo ni, make pun maha!!!”

“Maha ggapo?”

“Tu laa… oghe hok dok jjua dale ketapi tuh.. make megi so kkaro nge air tae rego ne ria doh lo nih…”


Complete silence for a while.


“Eh… budok hok jjua (di) sstesen (referring to stesen Pasir Mas) tu hidup lagih?”

“Budok mano..?”

“Hok tu laa. Jamae kito kecik2 mulo dio dok jjua ttupak… roti…aiskrim…”

“Ooo…hok tinggi2 rambuk kriting tuh…?”

“Ho.”

“Eehh… maaati doh dio nyoh…”

“Yo..? baru 2 bule lepah aku kelik nge ketapi aku raso dio ado lagih…”

“Maati dohh….”


Silence. Again.


          Mako lepah bebrapo jae driving, alhamdulillah slamak lah sapa Ppasir Mah. Moyae ambo napok sega la jugok. Hinggo la sket pening ppalo dio lepah minum air nnyor. Mek pom napok gagoh lagi… tapi tokleh gi nnoreh acak mano lah lo ni… hhmmmm~ Ya Allah, panjae kae umor mreko Ya Allah….

          Ambo ni sbenanyo takdok lah lamo doh tok kelik Klate… acak jugop lah keliknyoh… tapi perubahae pekae Pasir Mah tu napok macae ketaro sunggoh nah… dari segi infrastruktur ambo no komen… overhead bridge dekat taki air tu meme sapa ko lo ni lahh dop siap nyoh… tapi perubahae ketaro tu ado pado sosial masyarakat.

Buke la nok komplen gapo,.. kalu dulu meme payoh bena nah nok kelih anok daro tok gheti paka tudung bilo tubik dari rumoh… Tapi lo ni, buke stakak jenih oghe paka tudung baju lenge pendek, hok jenih rambuk mmeroh tok malu boceng moto jate pon ado!!! Punoh parops haiyyama~ mitok jauh la ado sdaro maro peel pranga lagu tuh… waaa gapo nok jadi hau anok daro Pasir Mah nih… “mek, toksoh bbesae oghe Pasir Mah la mek… alik Tanoh Meroh R. Panje Pasir Pekae nu rama lagi hok bejuruh,.. wahaha~”


p/s= Kepada non-Kelantanese yang berjaya baca dan faham sehingga ke line yang terakhir, syabas aku ucapkan. Kepada yang kurang berjaya, anda masih mempunyai banyak masa untuk memperbaiki mutu profisiensi anda. Muehehe~

7 comments:

Cik Ila said...

yak..belit molep lidoh kawe..demo ni gak eaa..hahaha

Nina Mazlan said...

pening aku dik baca entri kau. -.-

sleeping_maniac90 said...

xfhm..~~~

Musafir Kelana said...

berpinar mate aku tgok..@_@

hazee.hashim said...

Saje nak gtau kau fifi.. Ak phm post ini. Hoyeah! *mka bsinar2 kbahagiaan* B-)

fifi said...

hazeeQ; hehs. tak hairan lahh. mmg aku saje post entri dialek Klate yg ringan2. nnt lain kali aku post siri kecek klate yg mencabar aku nk tengok kau phm ke tak... muahaha~

Nur Ilyani said...

hoho..anjang..aq berjaya menghabiskan pmbacaan hingga ayat trakhir..hebat x?well,da duk ngan ore klate..